«Тіл - достықтың кілті, ынтымақтастықтың бастауы» атты тіл фестивалі

Қазақстан Жазушылар кітапханасының базасында Қазақстан халқының тілдері күніне орай «Тіл - достықтың кілті, ынтымақтастықтың бастауы» атты тіл фестивалі өтті. Фестиваль шымылдығы жергілікті ақындардың тіл туралы өлеңімен ашылды.
Ұлт ұстазы Ахмет Байтұрсынұлының туған күніне орайластырылған мерекеде А. Байтұрсынұлының ұрпағы, ағасы Қалидың шөбересі Шынболат Назарұлы Әміров «Отбасылық өмірбаян, «Алтын бесік» атты танымдық кітабымен таныстырып қатысушыларға батасын берді.
Әуезов ауданы Мәдениет және тілдерді дамыту бөлімінің бас маманы Исалиева Айгерим Мендешқызы аталған мерекеде құттықтау сөз сөйлеп, тіл – халықтың тарихы, мәдениеті мен өркениетке қол жеткізудің кілті, халықтар арасындағы достық, бірлік және келісім тірегі екенін атап өтті.
Алаш арысы Ахмет Байтұрсынұлы жайлы мазмұнды бейнеролик көрсетіліп, кітап көрмесіне библиографиялық шолу жасалды. Шара аясында мектебіміздің 10 “А” сынып оқушысы Мамырбекова Амина Қадыр Мырза Әлінің “Тілдің туы” өлеңін мәнерлеп оқыды.
Кеш соңында Қазақстан Жазушылар кітапханасының жетекшісі Мұхаммедова Мақпал Маратқызы фестивальді қорытындылап Орталықтандырылған кітапхана жүйесінің директоры Бектембаев Мейрам Еркеновичтің атынан алғыс хаттар табыстады.

​https://www.instagram.com/reel/C_ncfkVsMWi/?utm_source=ig_web_copy_link&igsh=MzRlODBiNWFlZA==​​​